كلمات قصيدة موت مهيوب - باسم الكربلائي
احسين الروحي يا ربّاه قِبله قِبله
على اجفوفي وضع من متِت قُبله
دعيتك لا تِصَعْد الروح قَبله
ولا أتقدّم اعله ابن الزجيّه
موت مهيوب ما صار بالدنيا مثله
مات عباس وايريد من ربّه مُهله
راد هالروح مَتعوف المخلوقه لجله
روحه الخضيبه تتبع حبيبه
مشهد فجيعه
صوب الشريعه
خلف الطبيعه بالما ورائيّات
عباس اِجاله
الموت او دناله
والحاله حاله
بالمختصر مأساة
الراس او تهشّم
الجسم او تخذّم
فاضت معَ الدّم
روحه ابسموّ الذات
او ظل عنده مطلب
واستمهل الرّب
والروحه يرغب
بالطف تظل ساعات
گال لله هالروح
خجلانه تصعد
او هاي جفين دعواه
مگطوعه تمتد
دون معراج هالروح
اِستأذَن واجه الرد
والرب مُجيبه
تتبع حبيبه
موت مهيوب ما صار بالدنيا مثله
مات عباس وايريد من ربّه مُهله
راد هالروح مَتعوف المخلوقه لجله
روحه الخضيبه تتبع حبيبه
المحّد يلوحه
تنزف جروحه
تتهادى روحه
بين السما والگاع
اتِرِف ابقهرها
تشبح نظرها
اعله اللي حضرها
وعالشاطي صبره ضاع
احسين ابعبُرته
بانَت كسُرته
قلّت قُدُرته
واختلفت الأوضاع
المتعنّي توّه
مو هذا هوّه
گام ايتلوّه
من شدّة الأوجاع
احسين من صاح بالكون
أصداءه تسري
صاح الآن الآن
كسرولي ظهري
او روح عباس بالغيب
مدمعها يجري
ظلّت كئيبه
تتبع حبيبه
موت مهيوب ما صار بالدنيا مثله
مات عباس وايريد من ربّه مُهله
راد هالروح مَتعوف المخلوقه لجله
روحه الخضيبه تتبع حبيبه
الموت اَضحى واقع
وابها الوقائع
روحه تتابع
رَجعة أُخوه احسين
اشبيه ابرجوعه
هاجت دموعه
أحنى ضلوعه
ابدربه وگع مرتين
ابكل مرّه يوگع
شي بيده يرفع
اعليه قُبله يطبع
او بي يمسح اعله العين
الروح اَدرى وَاعلم
احسين اشلگى او ضم
واشقبّل او شم
لابد لگى الجفين
اهنا جفين واهناك
جود السقايه
او هاي عالگاع ياحيف
مرميّه رايه
شاف آثار عباس
ابكل الزوايه
روحه قريبه
حبيبه
موت مهيوب ما صار بالدنيا مثله
مات عباس وايريد من ربّه مُهله
راد هالروح مَتعوف المخلوقه لجله
روحه الخضيبه تتبع حبيبه
احسين الخيامه
رَد ابعلامه
دمعه ايتهامه
بمشاهگ الأنفاس
الأوضح بعدها
خيمه الگصدها
طيّح عمدها
يعني انتهى العباس
الروح بأجلها
اتزايد خجلها
إخته ابوجلها
گامت تدگ عالراس
الأمر اشيحسمه
والدنيا قسمه
الماعنده جسمه
روحه ابأمض احساس
غاب مَن جان كفّال
زينب يحسره
اعتاز جفين لحسين
يسندله ظهره
الروح تحتار عالغُوث
ماعدها قُدره
اتحن للغريبه
اتحن للغريبه
موت مهيوب ما صار بالدنيا مثله
مات عباس وايريد من ربّه مُهله
راد هالروح مَتعوف المخلوقه لجله
روحه الخضيبه تتبع حبيبه
المُهله الطلبها
واضح سببها
تالي عگبها
مايهمّه وين ايروح
هذا إلتزامه
وي روح امامه
ابسوح الكرامه
روح او تتابع روح
وحده النهايه
بس روحه هايه
تجرع منايه
كثره او تشيل اجروح
مهما تحمّل
للمُهله مِفصل
يتسمّى مقتل
من ينزف المذبوح
هاي لحظات إنذار
صعبه اتوَصّف
الصار ملزوم بالموت
صار ايتأسّف
اتعود هالروح لله
من ينتهي الطّف
الآخِر مُصيبه
تتبع حبيبه
موت مهيوب ما صار بالدنيا مثله
مات عباس وايريد من ربّه مُهله
راد هالروح مَتعوف المخلوقه لجله
روحه الخضيبه تتبع حبيبه
كلمات قصيدة موت مهيوب
قصيدة: موت مهيوب
أداء: الحاج باسم الكربلائي
كلمات: الشاعر علي السقاي
التوزيع: ميشال فاضل