كلمات اغنية اشوفك وطن - عبدالله ال فروان
يالايام وش باقي تخبين يا الايام
عسى باقيٍ من ديرة الوصل نشاده
مضى عام عقبه عام واليوم ثالث عام
ولازلت بقدام الطواريق وجداده
سرى الليل وش غير الحماسه وابو تمام
نديم الورق والحبر والقهوه الساده
بصدري كلام وفي خيالي وصل واوهام
لو اخير منهن دمعةٍ فوق سجاده
أنا اكثر بشر تغريه الاحلام والاحلام
يموت الفتى من دونها مادرك مراده
ماعاد ادري شلوني من الفقد والآلام
قعدت اتجنب سطوة الوقت وعناده
يالايام وش باقي تخبين يا الايام
عسى باقيٍ من ديرة الوصل نشاده
مضى عام عقبه عام واليوم ثالث عام
ولازلت بقدام الطواريق وجداده
ياما عذبك وانت تهب حتى مع الانسام
وياما اقساك وانت تغرب الشخص ببلاده
تكلم تحرك سولي شي انا منضام
غدى السهر مهنه والتملل غدى عاده
احبك بشر ماني بحبك من الاصنام
علامك تضيم انسان تقدر على اسعاده
تشوف الغريب اللي عدالك وطاح وقام
سواله وش اللي ينفعك من توجاده
تحسب القصيد الهام والله ماهو بالهام
قصيدي شعورٍ ماعرف وش هي ابعاده
كتبت ومليت الارض شعر ووله وهيام
ولا طعت فيك الناس والناس نقاده
مثل من ملى الدنيا لحون وصدى وانغام
لو انه تشتت بين ورده ومياده
من الشعر ماخلد بشر واستمر ودام
لولا شعر ابن زيدون وش حجم ولاده
لو اضيع بك من ضاع فيك انت ماينلام
وش اللوم ونفوس المحبين منقاده
ياكم من صحيح يقتله منك السلهام
وكم من مريض منك والصبر مافاده
لك قلاده ان حبيت صارت عليك حزام
ولي الصبر لو نارك على الكبد وقاده
ياكثر الفتن من غرتك لاسفل الاقدام
وجهاد الفتى نفسه عليك اعظم جهاده
اشوفك وطن وتشوفني رحلة استجمام
واشوفك عمر وسنين ماهي بمنعاده
معي قلب واحد لو تقسمه خمس اقسام
بحبك بكل اقسامه الخمس وزياده
كلمات أغنية اشوفك وطن
كلمات : بندر الدويش
الحان : عبدالله ال فروان
توزيع ومكس : احمد حبيب