كلمات اغنية تخطيت - محسن ال مطارد
الحمدلله من غرامك تخطيت
واصبحت من بعدك ترى انسان ثاني
صحيح من هجرك تعبت وتأذيت
واداوي جروحي واساير زماني
قلبي وحطيته على كف عفريت
وامشي بلا وجهة واضيع مكاني
والله حماني من كلام الشماميت
اللي تحط العشر مثل الثماني
وشفت الحياه بزهو بعدك وغنيت
ياللي بعد فرقاي قالوا تعاني
تذوق ما ذقته ونين وتناهيت
وتذرف دموعك بين قاصي وداني
أسرفت في حبك كثيير وتغليت
واعطيتك أيامي وكامل كياني
فرشت قلبي مثل ما يفرش البيت
من صافي احساسي وخالص حناني
صبيت حبي في الدلال وتقهويت
ويفوح منها الهيل والزعفراني
وتخطي ولا كني اشوفك ليا اخطيت
واستقبل الزلات مثل التهاني
واعطيتك زياده على ما تمنيت
وحققت الاحلام وجميع الاماني
حطيت لك صيتٍ مع ذايع الصيت
وتطلع مثل طلعه سهيل اليماني
ضيعتها وآسف على ما تهقويت
وما ينجح الخدّاع ولا الأناني
ماصد وان صديت صديت صديت
والمستحيل انك بعدها تراني
الحب مثل النار والشك كبريت
شبيتها خلك معاها تعاني
والحمدلله من غرامك تعافيت
وما عاد تعرفني أنا انسان ثاني
كلمات أغنية تخطيت
كلمات : محمد الجعيدي
الحان : محمد حمود الحارثي
توزيع ومكس : حازم الابيض