كلمات شيلة طلوع سهيل - فايز العتيبي
وصلك الفرج ياللي تراقب نجوم الليل
ونفسك على السجات تعطي بشايرها
تبا تبرد اجواء المملكه مع طلوع سهيل
وتسهل عليك الحاجه اللي تدورها
معك ناس واجد ضاقت صدورها بالحيل
تحرا العلوم اللي تسلي خواطرها
ليا لاح برقٍ مقتفيه المطر والسيل
وهب البرد وجمرة القيض بعثرها
وجونا العسوس وجو بالاخبار بالتفصيل
علوم الحياه كلاً يباها ويذكرها
بدت رحلةٍ ماتقبل الهون والتأجيل
والاصحاب شالت عفشها في مواترها
اخوة رجالٍ فالمواقف تعدل الميل
على كل حال يعود الراي لأكبرها
ولا بينهم نمام والا ردي وبخيل
لهم سيرةٍ فالوقت ربي معطرها
لهم دور في قطع الفيافي وصفوة جيل
ولا تخلف الوجهه ليا شار شايرها
على صيد بر ودر خلفه وبن وهيل
رسومٍ طبيعيه بشتى مناظرها
وش احسن من البر النقي والابل والخيل
حياةٍ تسر البال يوم اتذكرها
ليا جالها حنه وجاء للحصان اصهيل
وهي سارحه خلفاتها مع عشايرها
تذكرني الايات في محكم التنزيل
ياسبحان خلاقٍ خلقها وصورها
يباري لها عودٍ معه برنو ودربيل
ويمشي لها في شفها ما يحيرها
يجوب الديار رضاً لها كل وقت محيل
تقول انه بكل المواقع يخيرها
زهور النبات اطيب من الورد والاكليل
ثلاثين نوع يعد ويسمي اكثرها
هذا والله الابداع والفن والتكميل
صحيح العلوم اللي تجي من مصادرها
بعيدٍ عن ازعاج الخواطر وقال وقيل
على شف بالي والوناسه من اخرها
كلمات شيلة طلوع سهيل
كلمات : عيضه الشلو
أداء: فايز العتيبي
توزيع : ايمن مخاوي