كلمات اغنية تحت الشعور - روان
بين الوله والشوق والاحساس والليل الطويل
اتوه من تحت الشعور اللي نزل كنه وبل
وش حيلة اللي رده الولهان من فك الجديل
عقب الفراق المرّ زاد الحب عن قلبه قبل
اليا طرت جتني مع النسناس بالسيف الصقيل
نسناس منها هزني هز الورق وانا جبل
ضاع الطريق اللي من أول كنت في دربه دليل
وانا الذي في وصلها حاولت في شتى السبل
كفخت جنحان المحبه دمت بالماكر سليل
مديت حبل الوصل مير الوصل ماجابه حبل
اسج عنها في فيافي نجد والجو العليل
واراقب نجوم السما ثم ترجع أشواقي دبل
اغناني الله من شعور الحب بالشي القليل
احساسها يكفي يرد الورد لامنه ذبل
حبي لها والله يشهد ماهو الحب الرذيل
أحبها حب المروه والشجاعه والنبل
لو مسها هرج الردي مامسها كف الذليل
حي الاصيله عرقها معروف في كل اصطبل
تستاهل الحب الحقيقي والعطايا والجميل
لو كان شعري من غياب الروح يضرب له طبل
نسيانها يمكن صعب الا تراه المستحيل
لحدٍ يلوم القلب من عشاقها ماهو خبل
اليا طرت جتني مع النسناس بالسيف الصقيل
نسناس منها هزني هز الورق وانا جبل
كلمات أغنية تحت الشعور
كلمات: سلطان الضعيان
غناء: روان