كلمات شيلة شيخة الغيد - الوليد ال عامر
فكرةٍ من عصير وهي تراود خيالي
لين ليلي جلاه الصبح وادبر عتيمه
هيّضتني وانا شاعر وصدري شمالي
يوم هب الهوا البارد طرقني نسيمه
قلت أغني مادام القاف جاله مجالي
دافعه شوق لعيون الفتاه العظيمه
شيخة الغيد بنت معربين الرجالي
بيني وبينها حب وميانه وشيمه
فارقه بالجمال وفارقه بالدلالي
حرةٍ بالوصوف وبالمبادي عديمه
درتن تستحق ارخص لها كل غالي
والله انها على الدنيا هي أكبر غنيمه
جودها من يمين وطيبها من شمالي
والله إنها حياة العمر وأجمل نعيمه
اللي اثرت حياتي بالحياء والجمالي
قربها لي دفا وبجمرة القيض غيمه
قبلها طافت سنيني وحيدٍ لحالي
ويوم أنا حزتها طابت جروحٍ قديمه
كنت ضامي غلا واروت عروقي زلالي
جددت ما فنى بالقلب واحيت هشيمه
هي غناتي وهي دون البشر راس مالي
والله إني لها لو كان عمري قسيمه
هي مغن القصيد وشمعتي في الليالي
دونها ما شعرت للذة الحب قيمه
حمّلتني جمايل ما قوتها الجمالي
يا عسى زولها بعيوني الله يديمه
وقفةٍ ما تزول ولو تزول الجبالي
كيف أبنسى جمايل وسط قلبي مقيمه
لجلها كم جرعت المر وأقول حالي
ما تراجع ولو ان العواقب وخيمه
ماحسب للزمن لو كان مانيب سالي
ابتسم لو محاديب الحنايا حطيمه
الخلاصة حشى ما مثلها شخص غالي
وما بقى في هواها واديٍ لأجل أهيمه
كلمات شيلة شيخة الغيد
كلمات : يوسف نوران البراك
اداء : الوليد ال عامر
توزيع ومكس : استوديو هاي تون