كلمات شيلة درب المفارق - خالد ال بريك

على الفياف الجرد حدتني الطواري للمسير
اشوف جرد البيد في عيني ربيع ومنزله
اسهج فيافيها قفر واجبر بها القلب الكسير
نصيتها واستنطقت لي جل همك وزهله

يلقى بها المشحون طبه خل معدوم الضمير
جو البلد جوه ومدهال العذارى مدهله
لاعشت ياراس الضعيف الى مدى شبحه قصير
تفدى الكريم اللي يمد الجزل ما يستبدله

مع دورت الايام شفنا اللي من اول ما يصير
الله يعين اللي ظروف الوقت ما تستمهله
قمت اتنطح ضيقة الايام مع ضيقة عصير
زودن على اللي يشحن الخاطر عصير ويشغله

ما كنها الا منادمة عين العشير مع العشير
درب المفارق باح سده فالزمان وغربله
لحدن يلوم اللي يذوق الحزن والشر الشرير
اللي يشوف الدار مظلم والاراضي ممحله

حصيله الذكرى يسامرها ليا الثلث الاخير
يعيش بين الشوق والحرمان وشعور الوله
ماودي اسهب في قصيد الحزن بالشي الكثير
طرق الحزن من فتره مجنب عنه ومقفله

بسوق مدحي فالكريم اللي يجير المستجير
بصمخ البيوت النادره ماهي بيوت مقوله
ترى الكرم ماينحصر على غني ولا فقير
فطره من الله بس اشوفه من صفات المرجله

ياحي راس اللي لا شان الوقت مادور شوير
لا قال طال وياصل اللي محدٍ قبل وصله
اطنخ يابو شباب وابشر بي ليا غار المغير
في كل نوماس وجماله كاسبين الاوله

ذخرك ياصنهات عودٍ يوم بقعاء تستدير
يسوق جاهه دون ميقافه وماله يبذله
شباب منصى من حداه الوقت فاليوم العسير
يلقاه من ينصاه وسط الدار ولا ف عمله

اسمٍ شهر بين الاسامي في ضحى اليوم الكبير
مجملٍ ربعه بذكره والفعول مجمله
يا مرحبا ترحيبة يصدح بها الصوت الجهير
تاخذ من طويق الشموخ وراسيه مثل جبله

فالمحفل اللي موقعه بين ونوره مستنير
ماهوب محتاج لقوقل ماب ولا بوصله
ربعي حماميدٍ شبع من فعلهم سبع وطير
يوم البيارق فالجزيرة بارزة ومحوله

فعولهم تخلي سروج الخيل من فارس وامير
يا كم عقيدا يوم صولات الدهاه نجندله
سلايل الروقه مروَيّه المنجّل والشطير
يوم ان للسيف اصطفاق ويوم للخيل صهله

لا ثارعج الخيل والعايل يقبقب بالهدير
عزوة عتيبه كل مايل فالزمان تعدله
مجدٍ بنوه بفعل مخلد على الصرح الشهير
فعلن مثبت ما تنومسنا بزيفن ننقله

كلمات شيلة درب المفارق

كلمات: فيصل بن محمد
أداء: خالد ال بريك