كلمات اغنية صدوق المشاعر - هادي بن جابر
يا ربي لك الحكم ولك الملك والتدبير
أنا في حماك من الصواديف متذري
قصرت الخطا والرأس ريّح من التفكير
يا عيني بعد طول السهر والعنا قرّي
مناديب شعري تطرق الباب كل عصير
يا ندّر بيوت الشعر الأول علي مرّي
جلست اتحرا لين حسيت بالتاخير
تحريت مدري ويش أنا صدق متحرّي
صدوق المشاعر كان ما خانه التعبير
طواريق شعره تشرح البال وتسرّي
أحب القصيد اللي على الناس له تاثير
ماهوب القصيد اللي من الشعر متعرّي
فقدت الشغف في كتابته واستماعه غير
شعتني قصيدة مريّ شالها مرّي
معي فكر ابو الطبب ولا عشى وفكر زهير
سبحت بخيالٍ ياصل الكوكب الدرّي
عزومي عزوم الذيب والنفس نفس الطير
وعن الناس وعيون المخاليق متورّي
ماجالست خلان النميمه ونفخ الكير
ولا ما انذكر خيري فلا ينذكر شرّي
تلحقتو اللي غاب بالظلم والتزوير
ولا من حضر ما منكم احدٍ بمتجرّي
لا جاملتكم ياللي تويقون وسط البير
فقدت الحصانه وانكشف للعرب سرّي
من الحاسد اللي يحسدك لا تحرا خير
معه لا تسولف عن علومك ولا تطرّي
رفيقٍ تعودت الجفا منه والتقصير
رواقٍ تشيله لا يدفّي ولا يذرّي
سلامي على اللي شامخٍ مثل ضلع النير
عن الماقف الغصاب ماهوب متبري
يقولون لي جسّاس وأقول وين الزير
وش اللي يحط الذيب الاسحم مع الحري
من أصله ردي بتغيّره موجة التغيير
تغرّه سوالف كل واشي ومتزرّي
يا كثر الخطايا اللي ما نلقى لها تبرير
وانا للخوي محزم وللهايب مجري
كلمات أغنية صدوق المشاعر
كلمات : عشق بن سعيدان
ألحان : عايض الزايعي