كلمات شيلة ملذات الهوى لـ الوليد ال عامر

كلمات شيلة ملذات الهوى - الوليد ال عامر

على عيد انكساري في غرامك قبل تسع سنين
تذكّرتك وقلت أكلّمك والنية النية
ألو لبيه يا أغلى من ذبحني قبل عام ألفين
ومِت ولا حييت إلاّ على ذكره وطاريّه

أحبك وين ما سجّت عيوني في الزمان الزين
وسجّجني الزمان اللي متاهاته خيالية
رعى الله كل يومٍ مرّنا ما قبل ذاك الحين
على ذمّة صبا الأيام والأحلام وردية

يوم إنك تستحي لا تذكر إن عمرك وصل عشرين
وأنا ما طاب لي إلاّ ما ورى العشرين بشوية
ياحلو أحلامنا ومراهقتنا والبلا بعدين
كشفنا ضحكة أول حلمنا ودموع تاليّه

عفا الله عن ملذات الهوا والعشق والتخمين
وسجّات الغرام ولذة الحب الحقيقية
فديتك يوم تاخذني على كيفك ولا أدري وين
معك من وين ما ذعذع هواك ومالت الفيّة

أحبك وين ما سجّت عيوني في الزمان الزين
وسجّجني الزمان اللي متاهاته خيالية
فديتك يوم تاخذني على كيفك ولا أدري وين
معك من وين ما ذعذع هواك ومالت الفيّة
معك من وين ما ذعذع هواك ومالت الفيّة

غدينا كنّك الشاعر وأنا واحد من الغاوين
نهيم بكل واد من العليّا للعزيزية
وبعد ما فاتنا ركب الحياه وشفت شوف العين
مسارات الطريق والاتجاهات المصيرية

عرفت إن كل شيٍ له نهاية والنّيا والبين
مصير الشاعر اللي خانت أوزانه قوافيّه
خلاص اعزم على الفرقى ولا لك في رقبتي دين
ترى حنّا تعدّينا الخطوط الاستوائية

تفاهمنا على حسم الأمور وكلّنا راضين
وتوادعنا ما كن قلوبنا خضر وهواوية
ومع هذا عجزت أسج وأنسى وأترك المقفين
أغصب القلب لكن الغلا قدرة إلهية
أعن لكل ما في نجد حتى شارع الستين
وأحن إلا ذعذع الغربي على أهل الشرق عصرية

أحبك وين ما سجّت عيوني في الزمان الزين
وسجّجني الزمان اللي متاهاته خيالية
فديتك يوم تاخذني على كيفك ولا أدري وين
معك من وين ما ذعذع هواك ومالت الفيّة
معك من وين ما ذعذع هواك ومالت الفيّة

وإلا منّه سرى من كل ليلٍ حلوة الثلثين
عرفت إن نسبة النسيان دون اثنين في المية
عسى ربي يعافيني ولا يبلاك قول آمين
تراني كنّي اللي واطيٍ له جمرةٍ حيّة

وتراني يوم كلّمتك فديتك عقب تسع سنين
ما غير أهيّض العبرات ولاّ النية النية
ما غير أهيّض العبرات ولاّ النية النية

Credits:

كلمات: ضيدان بن قضعان
اداء: الوليد ال عامر
توزيع ومكس: تون لايف