كلمات شيلة يا عشيري - الوليد ال عامر

ابتدا ضيق المشاعر مع ضيق الدروب
لين مابقى من الونس في صدري سعه

وين اعين لي مزاجٍ على الفرقا طروب
مايهيضه نوح ورقا ليا منه سمعه

ولا يهمه برق لامع ولا شمس الغروب
كل ما مالت ماميل معاها مدمعه

ودي اتبع سارق القلب لكني محسوب
ولا قلبي سامع اصداه ويقول اتبعه

جعل من لام المولع تولجه الكروب
ولا يشعل وسط صدره من الحب ولعه

كثر ما غنو هل الشعر في الريم اللعوب
ماجذبني غير غروٍ شمال المجمعه

جعل ديرة ضافي الرمش همال النصوب
من بكاير رايح الوسم تلقى منفعه

يا عشيري صار طيفك مع نود الهبوب
مستحيل الليل يمضي ولا اشوفك معه

باديٍ في وجه خلك من الفرقا شحوب
مثل ما يبدي على الطرس خط المطبعه

عقبك الايام دقت مزامير الحروب
الظروف تشتته والنصيب يقطعه

اكسري باب الجفيا علي من كل صوب
لامتى والهجر فينا معين مرتعه

عاشقك فيه الرفاقه تذرا ومحبوب
الفخر ماهوب جايبه من راس شمعه

سيف ربعه في المواقيف وجلال الخطوب
ما تربى بالضعافه ولا عاش امعه

دوسريٍ يفصم الدرع ما يفصم قلوب
كل ماتاحت يصيبك غروره يردعه

ماندور من عيون العرب رحله هروب
وانت عينك تهزم جيوش وتزيل اقلعه

كان حبك يعتبر ذنب أنا كلي ذنوب
بس ما ضنيت حبك نهايه موجعه

عقب فرقا عيونك النجل قلي كيف اتوب
لي سنه والقلب قلي وش اللي يقنعه

مخطر لاردد اسمك وانا صوتي طنوب
المذيّر كيف ينتخ عيونه باصبعه

ليت قلبي من هوا الزين منهي ومحجوب
كان ما قلبي من الحب لاقا مصرعه

كلمات شيلة يا عشيري

كلمات : علي الفصام
اداء : الوليد ال عامر
توزيع ومكس : تون لايف