كلمات قصيدة شاب وطفل - باسم الكربلائي
شاب وطفل وخيام وراية
سامحنا بجيناك هواية
إحنا الأشد ما بين جروحك
جم مرّة بالطف طلعت روحك
يا حسين، يا حسين
انا أول اهلك الطيّح دموعك
انا الأكبر أشبه الناس بخشوعك
من طحت يمي سمعت كسرة ضلوعك
الجَيَّة سهلة الصعبة للخيمه رجوعك
إعذرني بجفوفك ظل دمي
خليتك بموقف وي أمي
قلتلها الأكبر صار شزغره
ما ظل مكان نشمَّه بصدره
يا حسين، يا حسين
شاب وطفل وخيام وراية
سامحنا بجيناك هواية
إحنا الأشد ما بين جروحك
جم مرّة بالطف طلعت روحك
يا حسين، يا حسين
القاسم انا ودمي من عندك تِعَذَّر
من الخِيَم رَكَّضتَك عطَّشتَك أكثر
راسي من ينزف شنو قلبك تِذَكَّر
دم أبوي ال بالطَّشِت لو جدِّي حيدر
سامحني واقع وتحاجيني
وخليتك إنته تغمض عيني
لو أدري هيج يجرحك حزني
جا ما صحت يا عم أدرِكني
يا حسين، يا حسين
شاب وطفل وخيام وراية
سامحنا بجيناك هواية
إحنا الأشد ما بين جروحك
جم مرّة بالطف طلعت روحك
يا حسين، يا حسين
انا عبد الله اليموت ولا دمعتك
والسهم حسبالي مِتْعَنّي لرقبتك
لا إرادي طَلَّعِت إيدي وحضنتك
قَبَّلِت خدّي وبقى الدم على شفتك
وشفافك مفَطرة ودم يِجرَن
دمي ويا دمك يعني اختَلطَن
قلبك طلع ينزِف من ظهرك
صرت بمكانه ودفني بصدرك
يا حسين
شاب وطفل وخيام وراية
سامحنا بجيناك هواية
إحنا الأشد ما بين جروحك
جم مرّة بالطف طلعت روحك
يا حسين، يا حسين
آخر أهلك تعتذِر منك رُقية
بالسبي تَعّبتك عيونك عليَّ
واعتذر عن إشتياقي المو بيدَيَّه
للخرابه جبتك من الغاضريّه
من شفتك بلا راس ودامي
ظلينة ضامي يبوس بضامي
يالما كِسَرتِ الواحد خاطر
كِسرولَك عظامك بالحافِر
يا حسين
كلمات قصيدة شاب وطفل
أداء: الحاج باسم الكربلائي، علي باسم الكربلائي
كلمات: الشاعر حمزة السماوي
التوزيع: ميشال فاضل