كلمات قصيدة طالع يباهل - باسم الكربلائي

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

طلع طلعة محمَّد من تظلَّل بالغَمامْ
طلع طلعة نبي لاچن على هيئة إمامْ
طلع گبل الحرب رايد يحاجج بالسَّلامْ
يسولف بالعقل تالي يسولف بالحُسامْ

لو تصفن إلها تعرف طَريقه
احسين او محمَّد نفْس الحقيقه
ابسورة بني عمران
باهَـل بني مروان

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

تَعَالَوْا نَدْعُ كلمن بابْنه يتباهل يريد
وأباهِل بالشَّهيد ابن الشَّهيد ابن الشَّهيد
أنا ابني الأكبر او ياهو ابْنك إنته يا يزيد
من الكوثر بنيني وإنتو من ماءٍ صَديد

منهو اللي مثله لجْل الشَّريعه
ابكلشي يِضَحِّـي حتّى برضيعه
بوْلاده والرِّضعان
باهَل بني مروان

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

وإذا جبتْوا النِّسا وكْت التوجُّه بالدّعاءْ
نسائي زينب الماكو مثلها بالنِّساءْ
فرق بين العَلَمْهِن أحمر ابِّيت البِغاءْ
من اهْل العِفَّه والحجَّبْهن الله بالكِساءْ

أشرف نساكم هنْد او سميّه
واحنا نسانا ابنات الزچيّه
بأم الخدر والشَّان
باهَل بني مروان

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

وإذا جيتوا بِأنْفُسكم تريدون النِّزالْ
أنادي ارْكب بِنَفْسِي يا گمر هاشم تعالْ
إذا عدكم أيادي للدعّاء والإبتهالْ
أباهِل باللي ما عنده يمين او لا شِمالْ

جيبو زلمكم او خلّي نباهِل
وانا أنادي ها يابو فاضِل
ابخزرة گمر عدنان
باهَل بني مروان

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

الحدث لو رد تكرّر يختلف تالي المَصير
النصارى اشْرف من امَيَّه اللّي ما بيهم بَصير
محمَّد من طلع رَد واهْوَه لبْناءه نصير
وأنا ابني من طلع ردِّيته مشيول ابحصير

شاله اعْله صدره للخيمه جابه
الله يعينه الفاگد شبابه
وابذبحة الشُبَّان
باهَل بني مروان

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

البتول امّي اطْلعَت لاچن تحِفها المِستحاةْ
وعلي امباريها وامحاوطها من أربع جهاتْ
وأنا اختي الركّضوها آل اميَّه بالفلاةْ
بنات الزهره عگب الحِشْمه تالي امسلِّبَاتْ

شيْقدّم أكثر من تضحياته
وللباري ضحّه ابْهَيبة خواته
حتى ابسبي النسوان
باهَل بني مروان

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

طلعنه أهل الكسا خمسه ورجعنه امأمِّنين
لچن يوم الطفوف اخواني كلها امذبِّحين
بِنَفسي چان أخويه وشفته مفضوخ الجبين
تركني وعالنهر تارك شِماله واليمين

احسين ابْإباءه دين الله ما ذَلْ
يشبَه محمَّد يوم اللي باهَل
بس مو بني نجران
باهَل بني مروان

طالع يباهِل ابكامل وَقاره
طَلعةْ مُحمَّد لهْل النَّصارى
لاچن طلع عطشان
باهَل بني مروان

كلمات قصيدة طالع يباهل

قصيدة: طالع يباهل
أداء: الحاج باسم الكربلائي
كلمات: الشاعر الميرزا عادل أشكناني