كلمات شيلة اسامينا الكبيرة - الجفراني
اترك اللي لا يحل ولا يظل ولا يذري
واحتزم بمجرّي الخيّاف عساف الكليفه
ما لفزعتنا مزاج ورمز كود ورقم سري
لا وقفنا نضرب الاسماء الثقيله بالخفيفه
طيبنا مع كل طيّب شرنا مع كل شري
وان نزلنا في الديار المجدبه صارت مريفه
لا احتزمنا واعتزمنا واسمنا الرنان طري
غني يا وادي نساح وغني يا وادي حنيفه
ويوم استوى اللحن الحماسي مع الطاروق
لاسقنا البيوت الفاخره جات منساقه
عطونا مسامعكم للحظات ياهل الذوق
مادام إن مسامعكم للابداع مشتاقه
تعودت افكر دايما خارج الصندوق
وغدت فكرتي من بين الافكار خلاقه
انا لازهقت من المدينه وضول السوق
ضربت الخلا وفياضه الخضر وشقاقه
تشابك غصون الاقحوانه مع الزملوق
بروضٍ مريف وتوها زمت اوراقه
تداعبني انسام الهبايب ايلين اروق
واركّد دلالي فوق ضوي على فاقه
لاقامت تكاشح فوق صيهد رماح بروق
وعيون النشاما للنواميس توّاقه
قلطنا باسامينا الكبيره نظرنا فوق
مافي سلمنا تنكيس رايه ودناقه
للاصحاب ريف وللمعادين سم وعوق
وفنجالنا علقم على كبد من ذاقه
زعيم السوالف في البرامج ووسط السوق
لاجيناه بالوجه الجري عود علاقه
لاقام يتبجح لا ذرابه ولا منطوق
قبل لا نهمش خطته نكشف اوراقه
مع ان الردى بينه وبين الجميل فروق
لذا الدرب عشاقه وذا الدرب عشاقه
وابو وجه مايندى وراعي الغدر والبوق
عجز لايواجه ضربنا وارسل ابواقه
هذا رمحنا الفاري وذا حدنا المفتوق
وذا جمرنا ذوقوا حميمه وغساقه
نقدّر تعبكم لكن الله خلقنا فوق
بيارق نهد دايم على العز خفاقه
نراهن على حرٍ عزومه تسوقه سوق
ماسقنا الرجى في واحدٍ مامعه طاقه
سلامي على اللي كل مدحٍ عليه يلوق
مابه طيب لوجيه المطاليق ماساقه
قلطنا باسامينا الكبيره نظرنا فوق
مافي سلمنا تنكيس رايه ودناقه
ابو عامر اللي فعله ألجم وسد حلوق
أهداهم مياسم حمر ماهدالهم باقه
هذا الفارق الواثق هذا المصدر الموثوق
هذا اللي نجومه في سماء العز شعاقه
هذا مدرسة فن التعامل وحسن الذوق
هذا يوم صكات الوغى يحتمي الساقه
كذب من يقول إن راعي الاوله ملحوق
صعيبٍ على حزب التصاريح ملحاقه
على دحم كتفه ماتجرى ولامخلوق
تشوف الشبب في وجهه السمح واخلاقه
ابو تم وابشر واحتزم بي لاناشك عوق
وابو ياهلا والمرحبا اللي من اعماقه
قلطنا باسامينا الكبيره نظرنا فوق
مافي سلمنا تنكيس رايه ودناقه
لوايل لاتحسبها متاحه بدون حقوق
تراها بسم عودٍ ثنى دونها ساقه
يا عبدالله اسهجهم بوضحٍ وساع شدوق
تقول إنها لمعانق الغيم مشتاقه
حلا وانتكاسة ظهر والغارب المنتوق
ورق وسنـامٍ منـزوي به تفهاقه
خيار ابلنا محتله المركز المرموق
وسمل ابلنا ماهي معى سايق الناقه
قلطنا باسامينا الكبيره نظرنا فوق
مافي سلمنا تنكيس رايه ودناقه
كلمات شيلة اسامينا الكبيرة
كلمات : محسن بن عبدالله ال شماخ
توزيع ومكس : تون لايف