كلمات شيلة برق الحيا - خالد ال بريك
يشوقني برق الحيا وين ما لاح
صوت الرعد كنه يسوق البشاير
رحال واتبع للمطر وين ما طاح
اشد وانزل من غرام العشاير
في راسي اهدافي وفي كفي سلاح
لا من قصر في خطوته كل باير
أرزاقنا من دونها زرق وارماح
ما جاتنا بالواسطه والمساير
اطرد ورا الأحلام والبال ما ارتاح
عزم وكفاح ظروف والوقت جاير
ذقت الخساير في امل كسب الأرباح
ولا قدرت ارد ربع الخساير
جرح الزمن ما شخصه كل جرّاح
لا صار يجحد ما يهل العباير
يا صاحبي وقلوبنا بيض واصحاح
والله يعلم ما تكن الضماير
ماني بمتحسر على كل ماراح
رزقي على علاّم ما بالسراير
دقيت سلف الجيب من شرق الاسياح
تايه من ظروف الليالي وحاير
لكزز يسريني على خف وجناح
تقول يشرب من لهيب السعاير
مع سرمداء كنه مع العرق سبّاح
حذف الحصى خلفه شضايا ذخاير
اسري قطوع بليل ماهو بمسراح
من ديرتي لا يمة الغاط غاير
واليا اعترض كبري معه لوحة إيضاح
افرق معه والشوق بالصدر صاير
صوب الرياض اللي لها القلب منساح
دار الزعامه محتمين الحراير
اقلط على اللي لا للمواجيب نطاح
مزبان من دارت عليه الدواير
سلطان ابن سمار كسّاب الامداح
راسٍ على فعل النواميس فاير
من كبر ديوانه تقل صالة أفراح
منصى القبايل بين زابن وزاير
العود الأزرق من كثر فيه مافاح
دخانه مغير بلون الستاير
لو الزمان يجور ويدينه شحاح
يدين ابن سمار تندا غزاير
شيخٍ من الامجاد متقلد اوشاح
ما مر بالتاريخ عابر وساير
طاحت دول واسمه على العز ماطاح
نجما على كبد النواميس ناير
يا ذخر شيخا بالكرم يخلي امراح
متصدرا لأعظم شيوخ العشاير
في قبضته يبطش على كل سفاح
من يعترض قدمه يشوف العزاير
اسما كسب للفوز في صيهد رماح
يا حي حرا في سماء المجد طاير
اقدم بشعلا للميادين تجتاح
اقلهن يسوى ثمنها عماير
ارخص لها المليون مادوّر أرباح
والبل عظام المال ماهي خساير
من دون سمّارات قصاف الأرواح
اما طعام نسور والا كساير
وسعود ذكره في سماء المجد وضاح
وجهه يبشر بالسعد والسفاير
يفز لك لو جيت تنخاه مزاح
ولا يعتذر لو كان يم الجزاير
عتبان لا منه غدا ضرب وصياح
ما هابوا الأخصام والرمي ثاير
يوم الجزيره كلها وحوش واشباح
روسا تعاديهم تقص وتطاير
كلمات شيلة برق الحيا
كلمات: احمد الجويدي
أداء: خالد ال بريك