كلمات شيلة الذكريات - سفر الدغيلبي وخالد ال بريك
فالليلة اللي قمرها خافتن نوره
يرسم خطوطن ظلام الليل يغشاها
مصدر شعاعه مثل ضوح الاباجوره
يسرج وبعض المعالم ما تعداها
ويصارع الاسود الحالك وديجوره
ترده سدول وسدول ايتمثناها
الذكريات إحضرت بالصوت والصوره
تكميل رسمي من أولها ليا أتلاها
في قدومها كنها بالموت ماموره
مدري من اللي على التعذيب وصاها
مختصتن في عموق الذات وشعوره
وتجيد برمجة الاعصاب وخلاياها
ليا ولتني يصير الواقع اسطوره
أدور الشمس عز الظهر ما القاها
لو ابن سينا بكشافه وناظوره
يتعب لتشخيصها ماحصّل دواها
من كثر ماهيب مسمومه ومخطوره
لو هي تروح لعدوي ما اتمناها
تعرض تفاصيل حبٍ ولت عصوره
ماباقي في المحبة غير ذكراها
إن جيت ابي كبتها ماهيب مغموره
وإن جيت ابا اعيشها مانيب وياها
مشاعرٍ في لجوف الارض مقبوره
خبري بها ميتة مدري وش احياها
صيار من موحشة وأطلال مهجورة
عيّت تفارق وانا ودي بفرقاها
الشاعر النرجسي معروف بغروره
حقايقن في امهات الكتب نقراها
وبدونها يفقد انصاره وجمهوره
يستجدي الناس حتى يكسب رضاها
وانا على حالتي قوسين محصوره
نزواتي العاليه ياسي توطاها
أحاول أبني على المريخ مقصوره
وتحفها الريح وتحطم زواياها
والله ماعاد أشوف الارض معموره
هو جاني إحباط ولا الأرض وش جاها
والله ماعاد أشوف الارض معموره
هو جاني إحباط ولا الأرض وش جاها