كلمات اغنية الذكريات - مسعود بن شعفول والوليد ال عامر
ما غير أنا والشامخه يا بو هذال
وطرق الهوا الغربي وسجع القماري
في صحصحٍ ماحوله ابراج ورسال
واطلال ورسومٍ عليها ذواري
شهب الخرايم والمنازل والاطلال
تثر على اللي جاريٍ له جواري
خطرٍ يصيبه من توجاده هبال
ويهيم ويمتر فجوج الصحاري
يا دار كم مرك من اجيال واجيال
وكم عمّرو بك مبعدين المساري
زل السلف وآثار الايام ما زال
في كل شبر لكل ذكرى مواري
هنا رسمت لمقبل سنيني أمال
وهنا بديت بطوع قلبي اجباري
يا مل قلبٍ كل مامر مدهال
تغزي عليه من العزاري عزاري
وعينٍ تقول بنونها نار وخلال
كنه يحز عروقها بالشباري
الذكريات مسببه ضيقة البال
ياعين مسموحه بهل العباري
يوم اتوجد وإلحق الوجد موال
والله ماهو من طوعي ولا اختياري
تطري علي ذكرى لها قدر واجلال
وعنها مابي صده ومخرج طواري
رغم البساطه قانع بكل الاحوال
وزريت لا اقنع في الزمان الحضاري
كلمات أغنية الذكريات
كلمات : عبدالعزيز الوذيناني
إنتاج فني : استديو هاي تون
تسجيل وتوزيع : اسامه البارع