كلمات اغنية العلاقة فاترة - عبدالعزيز العليوي
العلاقة فاترة ما بين راسي والمخدة
كلها ساعة ولو كملتها فرصة سعيدة
يا هني اللي يجيه النوم حين يحط خده
ما عرف طرد الهوى ومصادم الروس العنيدة
الغرام مطرح الفرسان لابو جد جده
كل صبح وليل تلقاه متوسد له وليدة
راحوا أصحاب السروج وراحوا اصحاب الأشدة
في رصيده كلهم وانا رصيدٍ من رصيده
عاشق ما لي ونيس الا قصيدي يوم أرده
والقصيد يهد حيلي مير له حسنة وحيدة
كلما حسيت لي فالصدر ضيقة مستجدة
اظهر المسباح من جيبي وأسوي لي قصيدة
ما اتنقى غير بيت عنه ما للعين صدة
ويش ابا بالعقل لما جاب لي فكرة جديدة
يوم بعض الناس رميه للهدف دونه وسده
أنقل البندق على الذرعان واجيب البعيدة
والهموم اللي في صدري مستريحة مستعدة
صادتك يا قلبي اللي منت صيدت من يصيده
يا غناة الروح يا صبري على غيبتك مدة
قاعدٍ مالي جليس الا الشياطين المريدة
ارحميني وارحمي قلبي ترى ما فيه شدة
المحبة والغلا يجرون مع مجرى وريده
عالق بين الرجا والياس في حبل المودة
كلما غربل غرامك فيه قلت الله يزيده
لو على قلبي حديدٍ صلب من حده لحده
والله انك ما تخلينه حديدة مع حديدة
فالوطن كله من الدمّام حتى بحر جدة
ما اعشق الا انتي ولا هانت حكومتنا الرشيدة
فالوطن كله من الدمّام حتى بحر جدة
ما اعشق الا انتي ولا هانت حكومتنا الرشيدة
كلمات أغنية العلاقة فاترة
كلمات : وصل العطياني
غناء : عبدالعزيز العليوي
توزيع ومكس وماستر : حازم الأبيض