كلمات اغنية غيم فلاح المسردي | Falah Almesrdi

كلمات أغنية غيم - فلاح المسردي

يسري الليل وتثور الجروح العميقه
ويتقدّا هجوسٍ قبلها كان غادي
ودّي اتعب على نفسي وادوّر طريقه
واتكبّر على أكبر جرح ويصير عادي

حكم الاقدار ما تنساه ولا تعيقه
حسب ما مرّني ماهو بحسب اعتقادي
قبل تسعة شهور بفضل ربّ الخليقه
فتّحت عينها غيم وتحقّق مرادي

وردةٍ ما هي بتشبه ورود الحديقه
جابها اللي كفل رزقي وشربي وزادي
جات والروح مسجونه وصارت طليقه
زوّدتني شعور وعلّمتني مبادي

قاسيه بالكفاح وبالمشاعر رقيقه
لين رفرف على هذا التناقض فؤادي
يوم دكتورها بشرني وجفّ ريقه
طاح دمع السعاده والحزن لا ارادي

قالو ان سمعها قاصر وهذي حقيقه
ونبرة الصوت تسمعها على شكل ايادي
وقّف الوقت تحديداً بذيك الدقيقه
واعتزلت الكلام وصار الابيض رمادي

حبلي الصوتي اللي صرت ما عاد اطيقه
اتنوّى بقطعه لجل ما عاد انادي
ويش ابي بالكلام إن كانه يجيب ضيقه
يكفي اشوفها واهيم في كل وادي


كلمات أغنية غيم فلاح المسردي

أحدث أقدم