Ads-Top

كلمات قصيدة منيمم تشارج عمرو حسن | Amr Hassan

كلمات قصيدة منيمم تشارج - عمرو حسن

اتاري الفيلم دي نهايته
وانا الأعمى
بآمن حيّه من باب انها ناعمة
وسلِّم نفسي للخونة بسلامة نفس

اتاري الفيلم دي نهايته
وانا الأعمى
بآمن حيّه من باب انها ناعمة
وسلِّم ظهري للخونة بسلامة نفس

شيطاني الزرع
وماشي فروحي كاللبلاب
انام غافل عن الضربة
اشوف إيدها وهي بتمسك الحربة
أظنه عتاب
اتاري الباب وراه الغدر
وانا اللي بطبعه ما تعودش يقفل باب

قليل الأصل ما تغيّرش
وبنت البيت بتفرق عن بنات الليل
وصمت القادر انه يرُد
بيتفسر بقلة حيل
وليل الوحدة بيعوّد على التسليم
وسوء الفهم بيبدّي رفاق السوء عن الوحدة
بسدد بيدي
بواقي غلطتي الواحدة
في واحدة كانت جوه مني كلهم
ولما الزوم طلع خطوة
لقيتهم كلهم واحدة

من الليلة هاهد الشعر بإيديا اذا ذكرِك
وهضرب قلبي بغيابك لو افتكرك
وهقطع ظني من جدره اذا شكرِك
على الموتة اللي طالت ضحكتي وروحي
منعتك ليه تروحي بعيد
ما دمتي معايا بتروحي
وعرَّفتك على جروحي
وطوّل قلبي فيهم شرح
ما نابنيش غير إيدين من ملح
اديني برُد جرح بجرح
ويشهد ليلك المشتاق
وطعم الحضن كل فراق
ويشهد فجر بينور على النايمين
عرايا والملاية حنين
وتشهد سطوتي فيكي
وتشهد صحوة الشرايين

من الليلة
هاقولك قلة الحيلة بتبقى ازاي
واقولك بطش أحزاني بيبقى ازاي
وحق اللي اتعمل في الليل ومات الصبح
لاخلي المزيكات تصبح في عينك ناي
هتلقيني في ريحة التوب
ومعنى الخوف وطعم الشاي
وجرحي اللي انكشف للخلق من يمّك
هيتداوى في وقت قريب ومن يمّك

وقلمي اللي كتب مدحك
هيكتب شعره في ذمِّك
وينزف قلمه في هجاكي
وبكره هتبكي من روحك
على الكسر اللي جواكي
وطول ما عنيا شايفاكي
هتبقى جهنم الدنيا عليكي
وعاللي خلاكي
تردي الحسنى بأذيّه
وتمحي الحسنة بالسوءات
يا كسر بنات يا بنت الغدر

بكره هتبكي من روحك
على الكسر اللي جواكي
وطول ما عنيا شايفاكي
هتبقى جهنم الدنيا عليكي
وعاللي خلاكي
تردي الحسنى بأذيّه
وتمحي الحسنة بالسوءات
يا كسر بنات يا بنت الغدر
يا مسافات انقضت بالهدر
يا كاس داير يانور فاير
يا دايبة لفّ في دواير
وفاكره انك صعيب بَترِك
انا ما انفعش اكون شوكه
في حكمة ربنا في سترك

لكن لو قلت مش هسكت
ولو فضفضت مش هسكت
كبيرك إني اجيب سيرتك
لزوم العبره بين الناس
لولايا ماكنتي هتكوني
ولا تهاودي ولا تخوني
ولا شكلك ده كان شكلك
ولا لونك شرب لوني
لولايا ماكنتي ليكي مكان
ولولا تاريخي وكتابتي
وهمّي معاكي والاحزان
لكُنتي أرض صحرا وبور
مضللها شجر دبلان

ولولا مر بيننا الليل
ولولا الارض شربت نيل
ولولا الستر في التأويل
ما كانش الأمر هيعدي
لكن رب السما قادر
وخالق قلبي على قدي
بقول عادي وما يضُرش
وبمنع حكي ما يسُرش
واقول خلصت ومتراضيين
أخدتي اللي انتي جاياله
وفوقه لمون وتمر وتين
وخدت اللي يطلع شِعر
وفوقه قيراط وزرع متين
ومتراضيين
ما خلصتش الحياة يعني
ولا الناس انتهوا يعني
نهينا كلام لكن قلبي
هياخد حقه بمزاجه
ووالله انتي كارماني
بفوق ما كنت محتاجه
هطولك كل ما هكتب
واصيبك كل ما هصطاد
اديني عملتلك قيمة
وجو وتجربة وأرصاد
واديكي بقيتي مشهورة
ومضرب للمثل ساقط
وبكرة هبص على نايبك
وشجرك لما يتساقط
ولو كان عالكلام الحلو
فيه ألف حكاية بعديكي
ولو عالشعر والله
يغور الشعر لو فيكي
لو عالشعر يغور الشعر